مقابلة مع الموزع و الرابر الشاب نجم

 لو سألتك مين أكتر واحد أفاد السين المصري، ولو سألتك مين اكتر واحد أفاد البروديوسرز العرب. هيبقى عندك إجابة واحدة ملهاش تاني،نجم. عبد الرحمن نجم رابر وموزع موسيقي وكاتب وممثل مسرحي. اتولد سنة 98 في الغربية خصوصا المحلة الكبرى. وكان ليا الشرف اني اعمل معاه أول لقاء وأول مقال عنه. بدأ اهتمام نجم للفن في سن ال18 اشترك في فرقة مسرحية و نجح فيها لحد ما جت الكورونا ووقفت الدنيا. وفي نفس فترة بداية تعارفه بالمسرح اتعلم التوزيع من عاليوتيوب وبدأ من تحت الصفر بأقل معدات. نجري بالوقت ونروح ل2019 نجم عمل توتوريالز عاليوتيوب للشباب اللي لسه بادئ عن ازاي تعمل ميكس وماستر ازاي تعمل بيتات وخلافه.. يمكن دي اول توتوريال عربية نشوفها اصلا. بل وطورها في 2020 لما ابتدت تنتشر افتكر انه كان عامل سلسلة اسمها في المطبخ كان بيجيب كل أرتيست بتايب بيتاته المميز ويشرحه ويشرح ازاي عمله. كارير نجم حاليا مليان جدا لأنه في أخر فترة 2020 نزل تراكات كتير منها حمل و برودرووم وغير الغير , وفي بداية 2021 نزل البوم نقطة في المثانة اللي بيحتوي على 6 تراكات وانترو والألبوم فيه كذا نوع مزيكا ومنوع حتى في طريقة التوزيع. علشان تشوف رزق ربك لأجل انه مبخلش عالناس بعلمه دلوقتي نجم هو يعتبر من اكتر البروديوسرز تميزاً ولو سمعت اي تراك من غير تاج بتاعته هتعرف ان ده نجم اللي عامله. جت فترة رجوع ابيوسف وعمل الكام باك بشخصية هيثم السنتياجو كان على ايد نجم بكليبين سيستم و ولا وال2 بعتبرهم احلى تراكات الفترة دي كبيتات. بل وابيوسف اختار نجم لتراك مميز نعتبره نجم الألبوم وهو على ما يدوب التلج. كان ليا الشرف اني اعمل اول لقاء مع نجم وللأسف بسبب الظروف هنضطر نعمله كتابي.

بعد المقدمة نخش على طول عالاسئلة

–عايزين نتعرف عليك اكتر ممكن نبذة قصيرة عنك؟

–عبد الرحمن نجم مواليد 1 أغسطس 98 من الغربية تحديدا المحلة الكبري لكني عامتا مبتحركش كتير يعني حتي اللي من بلدي مبيشوفونيش لأن تحركاتي محدودة مبنزلش غير للضرورة


–بدأت مزيكا من امتى؟

–من اولى ثانوي كده دي اكتر فترة فاكرها لكن انا في العادي مش بفهم السؤال ده لاني وقت ما بدأت مكنتش عارف إني هبدأ علشان أكتب التاريخ فاهمني؟ فبحاول اجيب اقرب وقت من وجهة نظري.

–ايه التطور اللي حصل في شخصية نجم القديم والجديد ايه اللي اتغير؟

– شخصية نجم اتطورت لسببين. أولا التغذية الفكرية و إهتمامي إني أفهم , ثانيا التعلم من الأخطاء خاصتا من اللي حواليا. لكن شخصياً الحاجة الأهم اللي إتغيرت هي هداية ربنا ليا , الظروف اللي نشأت فيها تطلع مجرم أو رد سجون يعني. لكن ربنا والحمد له هداني وبعدني عن السكة دي. اما عن التطور كمزيكا , فأكتر حاجة فدتني هي الممارسة و إني مبتعاملش بتكبر ولو في حد معاه معلومة بعرفها منه. في ناس بيبقى عندهم معلومة تقلبلك دماغك فانا مببصش للموضوع كده لأننا زي بعض. اما من ناحية الراب والكتابة عامتاً, فأكتر حاجة إتطورت إني بقيت أنا بقيت بكتب حقيقتي واللي بيعبر عني. حلوة او وحشة بتكلم عنها فبقيت مرتاح عالمايك وحاسس إني لقيت نفسي لإني لما راجعت نفسي لقيتني مميز ومختلف عن الباقي. الكل بيتكلم في مواضيع وصيغة ليركس مختلفة علشان يجاروا السوق لكن انا بعمل كده لأجل نفسي أول حاجة. وعلى أمل ان اللي بعمله هيبقى هو التجاري في الفترة الجاية. بس ده ميمنعش إني ممكن أعمل تراك مع حد تاني غير أعمالي الشخصية علشان أجاري السوق. في الأول وفي الأخر أنا عاوز أكل عيش. التطور لعبد الرحمن كمجمل إنه بدل ما كان شخص فاشل بعيد عن ربه وعيلته وعلى مشارف الإجرام , بقى شخص قريب منهم وعلى الأقل كافي خيره شره ومش بيأذي حد التحول ده إحدى أهم أسبابه المزيكا.

–ليه بدأت التوتوريالز بل مكتفتش بكده أنت كل فترة تطورها وتعمل حاجات جديدة ايه الحافز او الدافع؟



– وقت ما دخلت المجال البروديوسرز كانوا أقل من صوابع إيدك , ومكانش فيهم حد معروف كمان غير قلة قليلة. لكن فعليا لفظ بروديوسر لوحده كان غريب عالناس. فلما أبتديت أتعلم كنت بتابع توتوريالز من الأجانب فقولت أعمل يمكن تبقى دعاية ليا. فعملت فيديوهات كتير اللي هما أول حبة , بس بعدين قولت لنفسي أنا لسه متعلم جديد وحتى مش فاهم أوي فإزاي بشرح للناس. فوقفت توتوريالز علشان أطور نفسي وقولت مش هرجع غير لما أفهم كل حاجة. وحرفيا كنت بتعلم من كل حتة وأي فيديو يجي قدامي علشان أبقى متأكد من الكلام قبل ما أقوله. أنا عندي عقدة من الأخطاء لإنها بتقلل ثقتي في نفسي وبتوترني. أما عن الإستمرارية والتطور فاللي خلاني أستمر ان مكانش قدامي غيره. الرابرز مش باصين للبروديوسرز , وأنا وقتها كنت بشتغل على نفسي كرابر. وفي نفس الوقت مكانش في حد عربي بيعمل الحوار ده لحد مالموضوع بدأ ينتشر. أنا كان أكبر هدفي إني أسيب حد يعلم الناس لإني كده كده كنت هوقف. والشباب دلوقتي البروديوسرز غيروا المشهد من إجتهاد لممارسة لغيره. أنت متقدرش تقارن السين المصري والعالمي , لكن تقدر تقارن بين البروديوسرز المصريين والعالميين. خصوصاً إني وقت ما بدأت كنت بقلد و الإمكانيات كانت معدومة فكنت بعاند لحد ما أبتديت أتطور بس كانت خطوة كل فترة إنما الشباب دلوقتي بيتطوروا أسرع مني وقت ما بدأت. مبقولش إن ليا دخل او إني سبب أنا الحمد لله مكتفي بإني فرد منهم مش أكتر. وكل واحد وصل فهو بسبب إجتهاده. التطور جه بسبب الغيرة , كنت غيران من الكونتينت بتاع برا وكنت عايز أعمل حاجة أوريجينال بنفس كفائة برا.

–وايه اللي حفزك انك تتعلم التوزيع أصلاً , إيه الإلهام؟

–البداية كانت تقليدية , كنت بكتب راب ومش لاقي بيتس زي إللي في دماغي فأتكعبلت في فيديو عن التوزيع ومن وقتها وأنا مسحول معاهم. الإلهام جه من إن دي الحاجة الوحيدة اللي كنت مرتاح وأنا بعملها و كان في ناس مهتمة بيها وفي فيد باك كويس. لما تكون فاشل في كل حاجة وفجأة تنجح في حاجة مرتاح فيها ده حافز كفيل يخليك تكمل