ملخص كتاب العادات السبع للمراهقين الأكثر فعالية

 كتاب "العادات السبع للمراهقين الاكثر فعالية" من "شين كوفي" أصدر سنة 98 ولازال لحد انهاردة من اكتر الكتب مبيعاً. شين كوفي هو ابن ستيفين كوفي صاحب كتاب العادات السبع الاكثر فعالية بس كان بيخاطب الناس الكبيرة مش بيفيد الشباب زي الكتاب ده.

الكتاب بيتكلم بإستفاضة عن 7 عادات او قواعد لو حطيتهم في دماغك حياتك هتتغير ويمكن توصل لحاجة مكنتش متوقعها، وبيناقش أهمية العادات وتأثيرها عليك. والكتاب يحتوي على أمثلة ونماذج لكل عادة وقصص كتيرة لناس وظَفوا العادة دي انهم يغيروا حياتهم.

ابتدى الكتاب بالعادة الاولى وهي انك تكون مبادر. ده معناه إنك تبطل تفكر بفشل وبطريقة تشؤامية وتبطل تحط كل فشل في حياتك على شماعة زي الظروف او اهلك او بلدك. وانك تبطل تتكلم بطريقة تحسس الناس التانية انها قليلة علشان النجاح بيجي بالتعاون ولو عملت كده محدش هيتعاون معاك.

بعدين تيجي العادة رقم 2 وهي تحديد اهدافك ذهنيا يعني انك تفكر انت عايز تعمل ايه في حياتك عايز تبقى ايه في المستقبل طب الطريق هيكون ازاي طب انا هحب المشاكل اللي في المجال ده ولا لا ومتخليش حد زي اهلك مثلا يختارولك مستقبلك و وظيفتك وزوجتك وحياتك علشان محدش هيعيش حياتك غيرك.

العادة رقم 3 هي حط أولوية في حياتك زي هدفك او شغلك او ايا كان اللي بتعمله علشان يحفزك لو انت حطيت شغلك الاولوية واهم حاجة في حياتك يبقى لازم تعمله في معاده وبكل طاقتك لو انت حطيت دراستك هي الأولوية رقم واحد يبقى هتعمل اللي وراك فيها أول بأول ومش هتتكاسل عنها.

العادة رقم 4 هي انك تفكر بطريقة فوز-فوز معناها انك متفكرش ازاي تتفادى الخسارة في المنافسة بل تفكر ازاي تكسب ولو جه حد منافس هو كمان يقدر يكسب علشان محدش اعلى من حد ولا احسن من حد ،هو يقصد هنا المنافسة في الأعمال التعاونية زي الدارسة مش في التجارة مثلا،

العادة رقم 5 انك تحاول تفهم علشان تكون مفهوم بيقول هنا ان اغلب الخلافات والمشاكل بتيجي من سوء التفاهم بمعنى إنك ممكن تكون مش فاهم الطرف اللي قدامك وزعلت منه علشان كده وهو كذلك فلازم تحاول تفهم اللي قدامك علشان اللي قدامك يفهمك ده بالبلدي كده.

بعدين بيقول في العادة رقم 6 التعاون هو اساس كل نجاح وهو اهم حاجة في الدنيا هو اصلا فكرة الحضارات من اول سيدنا ادم لحد انهاردة وفي تعاون أنت حتى في حياتك العادية بتتجوز وتخلف وهكذا علشان تلاقي تعاون في حياتك وانت لو قطعت التعاون مع الناس او بعدته عنك عمرك ما هتنجح ولا توصل لهدفك ابدا. بعدين اخر عادة بيقول اشحذ المنشار بمعنى انك تسن السكين لازم متحطش ضغط كبير عليك والا إنك مش هتعرف تكمل زي مثلا لو انت مسافر بعربية في مشوار كبير لازم تريح كل فترة وإلا هتعمل حدثة من الضغط وقلة التركيز فمهما الحاجة الللي حاططها أولوية عندك مهمة متهلكش نفسك فيها علشان تعرف تكمل

ده ملخص سريع للكتاب انما الكتاب في قصص وفي افكار وامثلة حية اكتر من كده بكتير لو عجبتك فكرة الكتاب اشتريه علشان هيغير حياتك 180 درجة